У Глыбокім прайшлі чатыры "вішнёвых" вяселля - Мае артыкулы - Каталог артыкулаў

У Глыбокім прайшлі чатыры "вішнёвых" вяселля

27 ліпеня ў рамках "Вішнёвага фестывалю" прайшла ўрачыстая цырымонія заключэння шлюбу.
   У той дзень перад глыбачанамі-землякамі   абяцанне кахаць, быць вернымі, дзяліць радасць і смутак на дваіх далі Алег і Юлія Раманчукі, Аляксандр і Людміла Белыя, Дзяніс і Анастасія Сарокі, Яўген і Марына Русакі.

   У сумесны жыццёвы шлях, іх, згодна беларускага абраду, моцна звязаных тканымі паясамі, адпраўлялі бацькі, родныя, сябры, а таксама галоўныя выканаўцы народнага тэатра фальклору "Цярэшка” і вядучая мерапрыемства, загадчыца раённага аддзела ЗАГСа Таццяна Баранава. Маладым яны адрасавалі наказ, словы віншаванняў і пажаданняў, каб жыццёвая дарога была роўнай, адносіны -- трывалымі, а пачуцці – гарачымі.
    Быў у маладых і першы вальс, і пацалункі пад дружныя крыкі "Горка”. А яшчэ ў іх слаўным летапісе ёсць старонка афіцыйнага віншавання старшыні райвыканкама Алега Морхата. Кіраўнік раёна, муж і бацька трох сыноў Алег Віктаравіч уручыў маладым пасведчанні аб заключэнні шлюбу, каштоўныя падарункі, вазы з вішнямі, на якіх нанесены фірменны знак фестывалю і, вядома ж, выказаў свае пажаданні.
-- Жывіце ў каханні і ў згодзе, умейце слухаць і чуць адзін аднаго, быць вернымі, і пяшчотнымі. Няхай над вашымі дамамі часцей кружацца буслы і прыносяць у вашы сем’і папаўненне. Нявестам жадаю, каб яны найхутчэй адчулі радасць мацярынства, каб папоўнілі ганаровыя рады матуль-гераінь і знайшлі жаночае шчасце сярод блізкіх і дарагіх людзей, -- сказаў старшыня райвыканкама.
Маладыя ўсклалі кветкі да помніка загінуўшым у Парку Перамогі, сфатаграфаваліся каля скульптурнай вішнёвай кампазіцыі і адправіліся   спраўляць вяселле, уступіўшы сцэну самадзейным артыстам з УП "Віцебскаблгаза”.

http://vg-gazeta.by/