Вёска Мосар адсвяткавала 500-гадовы юбілей

Ўрачыстасці прайшлі 30 жніўня 2014 года. На свята прыехалі жыхары Прыбалтыкі, Карэліі, Масквы, Санкт-Пецярбурга, Мінска, Салігорска, Віцебска, Лёзна, Полацка, а таксама з суседніх раёнаў.

Хлеб-соль прыняў ад удзельнікаў народнага тэатра фальклору «Цярэшка» старшыня райвыканкама Алег Морхат. Затым прысутныя разам з біскупам Віцебскай дыяцэзіі Алегам Буткевічам ўсклалі кветкі да помніка Ёзасу Бульку.

Адбылося адкрыццё памятнага знака, прысвечанага юбілею: каменя-валуна вагай 9 тон, усталяванага праз дарогу ад касцёла. З прамовай на яго адкрыцці выступіў старшыня Удзелаўскага сельскага Савета дэпутатаў Віктар Карман. Мітынг-рэквіем прайшоў ля помніка воінам-вызваліцелям, на якім выступілі старшыня раённага Савета дэпутатаў Галіна Унуковіч і старшыня раённага Савета ветэранаў Уладзімір Развадоўскі.

Дом самастойнага пражывання стаў наступным аб'ектам для адкрыцця. На яго рамонт і добраўпарадкаванне тэрыторыі затрачана 130 мільёнаў рублёў раённага бюджэту. Для пачатку ў Доме будуць пражываць пяць адзінокіх людзей.

Святочная праграма, у рамках якой прайшла прэм'ера песні-прысвячэння Мосар, ўзнагароджанне ветэранаў вытворчасці розных сфер дзейнасці, шматдзетных і маладых сем'яў, падвядзенне вынікаў конкурсу па добраўпарадкаванні вёскі, ільняное дэфіле глыбоцкага мадэльера Алены Глушонак, прэзентацыя краязнаўчага зборніка, прысвечанага Мосар, пачалася бліжэй да шасці гадзін вечара.

Для паважаных і заслужаных людзей краю былі і падарункі, і кветкі, і словы пажаданняў, і песні.

Праграму завяршыла выступленне гасцей свята - ансамбля беларускай песні "Маладзіцы» з аграгарадка «Навасёлкі» Пастаўскага раёна. Затым была моладзевая дыскатэка, а ў дзесяць вечара неба над вёскай расцвіло яркім рознакаляровым салютам.

Галіна Сутула

glubokoe.vitebsk-region.gov.by