Выйшла кніга прозы пісьменніцы

з Глыбоцкага раёна

      Дакументальную аповесць «Дзяцінства ў тумане вайны» напісала былая настаўніца СШ № 3 г. Глыбокае, жыхарка пасёлка Падсвілле, пенсіянерка Зоя Наваенка.

Кніга выдадзена 5 снежня ў Глыбоцкай друкарні накладам 65 асобнікаў і стала апошняй ў адыходзячым Годзе кнігі, выдадзенай аўтарамі Глыбоччыны.

- У ёй - жывыя, напоўненыя болем і любоўю да людзей ўспаміны дарослай жанчыны пра вайну і пасляваенным часе. Гісторыя тых далёкіх гадоў перададзена праз ўспрыманне маленькай дзяўчынкі Зоі, якая ўсё бачыла сама і прапусціла ўбачанае праз сваё сэрца, - кажа Зоя Максімаўна. - Прадмову да маёй кнізе напісаў член Саюза пісьменнікаў Беларусі, празаік Валерый Гапееў.

Зоя Наваенка нарадзілася ў 1936 годзе ў Віцебску. Скончыла сярэднюю школу, хіміка-біялагічны факультэт педінстытута імя Кірава (цяпер Машэрава). Ёй, жонцы кадравага ваеннага, давялося працаваць у розных школах Беларусі. Больш за 25 гадоў выкладала біялогію ў СШ № 3 горада Глыбокае.

Піша вершы. Некаторыя з іх дзякуючы кампазітару Ганне Шаколы пакладзены на музыку і сталі песнямі. Зоя Максімаўна супрацоўнічае з часопісам «Вожык». 1 верасня атрымала ганаровую грамату рэдакцыйна-выдавецкай ўстановы «Літаратура і мастацтва» за другое месца ў конкурсе, прысвечаным 70-годдзю выдання (у намінацыі «Тэмы для малюнкаў»), і каштоўны падарунак.

Цяпер Зоя Максімаўна працуе над зборам матэрыялу для паэтычнага зборніка з працоўнай назвай «Рэха».

Лілія Ветрава