"Залатых Купідонаў" на Віцебшчыне стала больш
 

Добрай традыцыяй на Дні беларускага пісьменства стала ўручэнне знакаў-сімвалаў "Залаты Купідон” пераможцам рэспубліканскага літаратурнага конкурсу  "Лепшы літаратурны твор года”. У шосты раз у Глыбокім узнагароджаны лепшыя пісьменнікі, хто найбольш ярка праявіў сябе як творца ў мінулым годзе.

Акрамя пераможцаў, узнагароды (дыпломы другой і трэцяй ступеняў) атрымалі таксама прызёры рэспубліканскага  конкурсу ў розных намінацыях.

Пасля сёлетняга Свята беларускага пісьменства на Віцебшчыне на двух "Залатых Купідонаў” стала больш: запаветныя статуэткі атрымалі: у намінацыі "Паэзія”  — паэт з Віцебска Алег Салтук (за кнігу вершаў "Дзве зары”);  у намінацыі "Драматургія” —  пісьменнік з Докшыц Фёдар Палачанін (за кнігу драматычных твораў "Зраненае сэрца”).

Дарэчы, яшчэ адна статуэтка ў намінацыі "Лепшы твор у галіне гумару і сатыры” ўручана галоўнаму рэдактару часопіса "Вожык” (ураджэнцы Пастаўскага раёна) Юліі Зарэцкай – за кнігу "Шчаслівыя людзі”.

Усіх пісьменнікаў, якія ў гэты дзень узыходзілі на галоўную сцэну свята па ўзнагароды, назваць не маем магчымасці, а вось астатніх пераможцаў, уладальнікаў купідонаў, згадаем. Гэта  Славамір Антановіч (намінацыя "Публіцыстыка”:за кнігу "Судьба до востребования”), Мікола Маляўка (намінацыя "Дзіцячая літаратура”: за кнігу "Коласаў абярэг. Дзецям пра Якуба Коласа”), Уладзімір Скарынкін (намінацыя "Мастацкі пераклад”: за пераклад кніг Дантэ і Пятраркі), Зіновій Прыгодзіч (намінацыя "Літаратурная крытыка і літаратуразнаўства”: за кнігу "Постаці”), Мікалай Ільінскі (намінацыя "Проза”: за раманы "Последняя ладья викингов”, "Братья по крови”, "Воины-хранители”), Анатоль Статкевіч-Чабаганаў (намінацыя "Лепшая кніга гісторыка-краязнаўчага жанру”: за кнігу "Я – сын ваш”), Іван Юркін (намінацыя "Песенны жанр”: за цыкл патрыятычных песень, музыку да якіх напісаў Алег Елісеенкаў).

За цудоўна арганізаванае свята ўзнагароду атрымаў старшыня Глыбоцкага райвыканкама Алег Морхат: нагрудны знак яму ўручыў старшыня Саюза пісьменнікаў Беларусі Мікалай Чаргінец. 

А. Садовіч.
Фота Алены Адэдэджы.