У Глыбокім на вуліцы М. Горкага адкрылі

мемарыяльную дошку Клаўдзію Дуж-Душэўскаму

31 жніўня, напярэдадні Свята беларускага пісьменства на вуліцы Горкага ля дома №22 сабраліся прадстаўнікі мясцовай улады, інтэлігенцыя і госці горада, дэлегацыя з французскага горада-пабраціма Фёр. Нагодай для сустрэчы стала прыемная падзея: адкрыццё мемарыяльнай дошкі нашаму земляку — Клаўдзію Дуж-Душэўскаму.

Намеснік старшыні па сацыяльных пытаннях Глыбоцкага райвыканкама Галіна Уладзіміраўна Унуковіч, адкрываючы ўрачыстае мерапрыемства, адзначыла, што за мяжой захапляюцца архітэктурнымі будынкамі, а яны створаныя чалавекам, які нарадзіўся ў Глыбокім. Акрамя таго, Клаўдзій Дуж-Душэўскі пакінуў свой след і на Радзіме: друкаваў на беларускай мове падручнікі, удзельнічаў у выданні беларускамоўных часопісаў, шчыраваў на ніве адраджэння нацыянальнай ідэі, праявіў свой акцёрскі талент, сыграўшы Сцяпана Крыніцкага ў купалаўскай "Паўлінцы”. 

Мемарыяльная дошка заняла сваё месца на фасадзе дома №22 па вуліцы М. Горкага невыпадкова. Яго жыхары, Раймунд і Леанарда Салодкія, знайшлі першы запіс у сваёй дамавой кнізе, датаваны 1961 годам. Аказалася, што якраз у гэтай хаце быў прапісаны Аляксандр Ігнацьевіч Душэўскі, 1882 года нараджэння, а побач знаходзіўся дом сям’і Клаўдзія Дуж-Душэўскага. На жаль, пакуль невядома, што звязвае Аляксандра і Клаўдзія, сваяцтва ці аднолькавае прозвішча, але хочацца верыць, што іх жыццёвыя лёсы перапляталіся тут, дзе яны зрабілі першыя крокі па глыбоцкай зямлі.

Алена ХАЙНОЎСКАЯ.
  Фота Алены АДЭДЭДЖЫ.   

http://vg-gazeta.by/index.php/Культура/