Беларусы аднавілі Біблію Францыска Скарыны па старадаўняй тэхналогіі 

      Беларускі гісторык і публіцыст Уладзімір Ліхадзедаў першым у свеце ўзнавіў Біблію Францыска Скарыны па старадаўняй тэхналогіі. Кнігу прэзентавалі ў Мінску на прэс-канферэнцыі, прысвечанай Дню беларускага пісьменства. 

Праект Уладзіміра заняў два гады. У колькі абышоўся, аўтар не кажа, але падкрэслівае, што ўзнавіць Біблію - вельмі дорага: 
 
- Кніга неацэнная. Яна ўсяго ў сямі экземплярах і сёння нідзе не прадаецца. Але такая кніга павінна быць у вядучых бібліятэках і музеях краіны. 

Перад тым, як брацца за працу, аўтар паездзіў па вядучых музеях кнігадрукавання ў Еўропе, паглядзеў, на якіх станках і паперы такія кнігі друкавалі. 

У выніку Біблію надрукавалі на самаробнай паперы з ільну. Станок стварылі па гравюрах XVI стагоддзя. Для друку адлілі спецыяльныя формы часоў Скарыны. Некалькі асобнікаў зрабілі каляровымі. Праілюстраваў вокладку па матывах кніг Францыска Скарыны мастак Барыс Цітовіч. 

Эксперты з Масквы і Санкт-Пецярбурга, па словах Ліхадзедава, высока ацанілі праект і заўважылі, што кніга мала чым адрозніваецца ад арыгінала. 

            Аўтар праекта заўважыў, што ніхто ў свеце да гэтага кнігі з захаваннем усіх старадаўніх тэхналогій на самаробнай паперы не ўзнаўляў. Рабілі толькі фрагменты кніг. 

tut.by